Apna TransportMaster account delete karna
Aap kahiye, aur hum aapka account aur aapke saare record mitaa dete hain. Is page par likha hai ki kaise kehna hai, kya mitega, aur kitne din lagenge.
Delete karwaane ke liye kahan likhein
Usi mobile number se sandesh bhejiye jisse aapka TransportMaster account bana hai. Do me se kisi bhi tarah:
- WhatsApp — +91 93183 01956
- Email — support@transportmaster.in
Kya likhna hai
Teen line kaafi hain. Itna isliye chahiye taaki hum pakka kar sakein ki kehne wale aap hi hain:
- Wo mobile number jisse account bana hai
- Apni firm ka naam, jaisa app me likha hai
- Ye shabd: mera account aur saara data delete kar dijiye
Uske baad kya hoga
- Ek working day me hum jawab de kar pakka karte hain ki aap hi hain
- Aapke haan kehne ke baad 7 din ke andar account mit jaata hai
- Ho jaane par hum aapko bata dete hain
- Uske baad na aap, na hum — koi bhi us account ko khol nahi sakta
Kya mitta hai aur kya rukta hai
| Data | Kya hoga | Kab |
|---|---|---|
| Aapka login — naam, mobile number, email, password | Mit jaayega | 7 din me |
| Firm ki detail — pata, GST, PAN, logo, signature | Mit jaayega | 7 din me |
| Aapke record — party, supplier, truck, driver, trip, bilty, ledger, payment, kharcha, POD | Mit jaayega | 7 din me |
| Account ke neeche bane staff ke login | Mit jaayega | 7 din me |
| Humare encrypted backup me padi copy | Purane backup ke saath hat jaayegi | 30 din me |
| Subscription ke payment ki rasid, jo tax kanoon ke hisaab se rakhni padti hai | Rakhni padti hai | Jab tak kanoon kehta hai |
Sirf payment ki rasid rukti hai. Usme invoice number, rakam aur taareekh hoti hai — aapki party, trip ya ledger ka usme kuchh nahi hota. Use kanoon se pehle mitane ki ijaazat hume nahi hai.
Pehle apna data nikaal lijiye
Delete hone ke baad wapas nahi aata, isliye kehne se pehle copy rakh lijiye. App ki har report Excel me download ho jaati hai — trip, party, supplier, ledger, payment aur kharcha. Jo rakhna ho wo account chalu rehte hue hi utaar lijiye.
Account mit jaane ke baad hum kuchh bhi wapas nahi la sakte, chahe aap agle din hi kahein.
Sirf paisa dena band karna ho to
Kuchh delete karne ki zaroorat nahi. Bas renew mat kijiye — subscription khatam hote hi account sirf padhne ke liye reh jaata hai, aur aapke record waise ke waise rehte hain. Baad me kabhi wapas aakar chalu kar sakte hain.
Account tabhi delete kijiye jab pakka ho ki in record ki kabhi zaroorat nahi padegi.
Aksar poochhe jaane wale sawaal
Delete hone me kitna time lagta hai?
Aapke haan kehne ke 7 din ke andar account aur saare record mit jaate hain. Backup me padi copy 30 din ke andar purane backup ke saath hat jaati hai.
Delete ke baad data wapas mil sakta hai?
Nahi. Delete hone ke baad wapas nahi aata. Isliye kehne se pehle jo report rakhni ho wo Excel me download kar lijiye.
Account delete karne ke baad aap kuchh rakhte hain?
Sirf subscription ke payment ki rasid, kyunki tax kanoon se wo rakhni padti hai. Usme invoice number, rakam aur taareekh hoti hai — aapki party, trip ya ledger ka kuchh nahi.
Poora account nahi, sirf kuchh data delete karna ho to?
Wo aap khud app me kar sakte hain — trip, party, supplier aur payment alag-alag mita sakte hain. Mitane ka haq sirf owner ke paas hai. Humein tabhi likhiye jab poora account band karna ho.
Mere staff ke login ka kya hoga?
Wo account ke saath hi mit jaate hain. Staff ke login sirf aapke account ke andar hote hain, kahin aur nahi jaa sakte.
Delete karne ko kaun keh sakta hai?
Sirf account ka maalik, aur usi mobile number se jisse account bana hai. Kuchh mitane se pehle hum pakka karte hain ki aap hi hain, kyunki ye wapas nahi hota.
Privacy policy — hum kya rakhte hain aur kyun · Support aur help